Diplomasi Musang .. ondeh harum baun nyo…

Ado arati kiasan nan tasabuik dek si Upiak Bijak wakatu inyo masih ketek-ketek di kampuang nyo. Yaitu soal “musang babulu ayam”.   Kecek bundonyo ; “ aratinyo, urang jaek pura – pura elok. Bisa juo urang nan pura – pura manolong tapi niek nan sabananyo iyolah inyo akan mancilakoan awak “. Sudah tuh, ado pulo carito nan pernah dibaco dek si upiek bijak. Carito dongeng sangkek ketek daulu, yaitu carito singo lapa.

Caritonyo coiko yo…. – Saciek hari singo mandapek mangso barupo : kabau, domba dan ayam. Singo ko maimbau konco – konco palangkinnyo nan banamo : musang dan srigalo, untuak duduak makan basamo. Co urang makan barapak – alah langkok pulo sagalo macam makanan lainnyo. Kecek urang kampuang – singo ko makan barapak jo sakutu – sakutu nyo mah…

Katiko hidangan alah ka dimakan, bakatolah singo ko ka srigalo : “ Ba a di ang (ku).. “ Nan ma untuak den ko haa… Mandanga pertanyaan singo ko, srigalo tuh manjawek sarato takzim ka singo :

“ Nan mulia Bagindo ( mohon maaf pado nan bagala Bagindo)… tantu sajo bagindo nan ka mandapek hidangan nan paling gadang saat kini ko..Iyolah kabau nan manjadi makanan nan lamak sarato pantas untuak bagian Bagindo mah….

“ Bialah domba untuak ambo dan ayam untuak si musang, kecek srigalo ko ka singo..

Nan banamo singo ko..iyo sabana makhluk Tuhan nan samporono santiang jo tingkah laku nyo. Mambuek urang manggigiah katakui’an. Nyo kalua an suaro hariak gadangnyo ka konco-konco nyo tuh…

“ Indak bisaaa…..!!! Sambia nyo cakau muko srigalo ko.. Dek gara-gara cakaran singo tuh – mambuek mato srigalo tuh tabudua kalua …(alias copot).

Bapaliang pulolah singo ko ka musang. Batanyo pulo inyo ka musang : “ baa dek waang musang…??? Nan ma nan untuak di den..  Manggaratek sarato takuik musang manjawek partanyaan singo ko.

“ Yang Mulia.., manuruik ambo – kok kabau sangaik  cocok untuak dimakan pagi.… domba untuak makan siang dan ayam untuak makan malam. ( Sabananyo ati musang ko manggarutok – manggarutok ka singo tuh sambie nyo mengecek dalam ati : “ habieh an banalah dek waang..!!)

Mandanga jawek musang sarupo tuh, indak tatangguang lai sanang hati singo mandanganyo. Iyo sabana arif musang ko mah. Bakatolah singo jo suaronyo nan gadang : “ Ndeh… yo sanang hati den mandanga kecek waang musang… ! Rancak bana pandapek waang ko mah.

Dari ma waang ko baraja …!??? Apo jawek musang ?? “Ambo baraja dari pangalaman hiduik den. Calieklah mato serigalo alah tabudua ….” .

Sasudah tuh – lapang hati si Musang dek maraso inyo alah barasil manyanangkan hati singo tuh sarato lapang pulo hati singo dek baitu bana pangaratian nan diagieh dek musang ko.

Jiko diambiek arati kieh musang ko.. urang kini banyak nan malakukan mode musang tuh. Itu ha… urang – urang nan mintak di contreng – contreng. Rusuah hati si upiek bijak jiko mangana ko. Itu pulolah nan di otakan dek urang urang di kantua si Upiek Bijak. Kecek kawan-kawannyo. “ Urang nan kaduduak di Dewan Perwakilan Rakyat nan tarhomaik tu iyolah singo-singo… sarigalo.. jo musang-musang nan babulu domba…mah. Baa ka indak.

Paratianlah…!!, kecek kawan – kawan si Upiak bijak. Tamanuang si Upiek mandanga ciloteh kawan-kawannyo tuh.. Akhie nyo bakato-kato surang si Upiek Bijak : “Kok co itu bana nan tajadi, manga pulo awak mamiliah urang-urang nan mintak di contreng tuh. Sia nan ka dipiliah. Baa sipak sintuangnyo. Awak kan indak tau.

“ Apolai – urang nan kamanjadi wakie wak tuh – bajuang surang –surang jo biayo surang-surang. Indak ado pembinaan dari Partai bagai doh. Yang ado hanyolah koordinasi baa caro suaro nan kurang bisa disumbangkan panambah suaro urang sapartainyo. Tinggal sajo urang nan disumbang membuek paretongan jo nan manyumbang. Persis saroman urang badagang. Baitu pulo katiko urang mancaliek debat partai di Tipi, kecek si Upiek Bijak – urang badebat di Tipi tuh sarupo urang bacakak.

“Kok bacakak sarupo itu pulo di parlemen baeko, iyolah sabana kandang binatang nampaknyo parlemen awak tuh mah… “ Kok lai bana urang nan dipicayo sabagai wakie nan kaduduak di parlemen awak tuh – eh inyo barado di tampek lain pulo. Ondeh ka baa juo lai… Baitu pulo kajadian nan dialami si Upiek Bijak dalam pengalamannyo baru-baru ko. Manuruik si Upiek – baa bana buruak laku musang – ternyato ado juo jaso musang dirumahnyo.

Alah ba ulang kali si Musang – ma agieh baun pandan di kamarnyo. Wanginyo saroman kamar anak daro. “ Ondeh .. sabana haruum….????!!! Mulonyo agak takajuik inyo jo baun pandan ko.

“ Eh.. kok ado pulo makhluk aluih nan manghuni kamarnyo tuh “. Urang dirumah si Upiek heboh. Dari ma asal baun pandan ko. Si upiek balun pernah mengenali baun aneh ko. Nan jaleh – katiko inyo mancari sumber baun tu – alah ado se aie – nan taserak di lantai kamarnyo. Baitulah mulo partamo si Upiek mengatahui baun musang wakatu itu. Sasudah tuh – lah baulang –ulang si musang nang ko mandatangi rumah si Upiek untuak manyumbang baunnyo nan harum tuh. Saroman di – diagieh airfreshener dek musang di kamar si Upiek tuh.

Nan herannyo si Musang – pandai pulo mamilieh tampek inyo ma re fresh tuh. Selalu sajo si musang ko me re fresh di kamar si Upiek Bijak. Akhie nyo alah bakonco karik pulo si Upiek jo musang tuh kini. Walau inyo indak pernah barirobok muko, namun hanyolah baun harum si musang.

Dek Si Upiek Bijak phobia jo binatang nan babulu saroman kuciang – mancik – tupai – musang, bialah inyo indak pernah basirobok,

“ Hii… galigaman rasonyo. .. sabana manjiji’an. Tapi antah manga pulo binatang – binatang ko sanang indekost dirumah si Upiek tuh, walau indak kajadi sobaik si Upiek Bijak.

Asal tahu sajo, rumah si Upiek Bijak ko lataknyo dipinggia danau nan dinamo an nyo – danau maninjau ketek., tantu se sadonyo binatang banyak nan sanang maronggok di sinan. Ado sumber aie, ado makanan pulo tantunyo.

Akhienyo, katiko menghubungkan arati musang babulu domba jo pangalaman si Upiek jo Musang nan indekost pulo dirumahnyo – kiasan itu jadi balain. Alun tampak sipaik musang nan buruak laku co singo….

” Liek  lah. “ Karaie “ nyo se atau “ kasungai” (kato rang piaman) si Musang tuh – haruummm…!! Sabana bedo jo baun domba atau kambiang nan babaun hariang. Baraso musang babulu ayam adolah “ urang jaek pura – pura elok atau bisa pulo urang nan pura – pura manolong tapi niek nan sabananyo iyolah inyo akan mancilakoan awak “ – alun pulo ta bukti di kehidupan Upiek Bijak.

Barangkali nan di dape’an dari carito dongeng dan arati kiasannyo hanyolah bahasonyo musang ko mampunyoi tingkek diplomasi tinggi mah. .

” Lai tau sanak… urang nan manjadi diplomat.., Katiko inyo manjawek iyo – sabananyo inyo bakato “ mungkin” . Katiko inyo manjawek mungkin sabananyo inyo manyabuik indaaak…!! . Jiko inyo manjawek indaakkk…!!! haa.. itu barati inyo bukan diplomat tu mah….

Baitu pulolah sipaik musang dimato si Upiek Bijak. Musang ko saroman diplomat, sarupo katiko inyo mengecek dan mambujuak si Singo lapa tadi.. Jadi kok ado wakie rakyat awak nanti – nan pandai badiplomasi saroman musang – sabuik se lah inyo diplomat musang, kato si Upiek ka konco-konconyo dikantua.

Takekeh…kekeh…urang bi galak mandanga – perumpaan si Upiek katiko kawan-kawannya sadang mampabincangkan calon wakie rakyat awak.

Puspiptek, Setu, Tangerang Selatan, 20 Februari 2008

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

%d blogger menyukai ini: